Ժնևի հայ համայնքը կվերագտնի իր ներքին խաղաղ կյանքը

Սույն թվականի հոկտեմբերի 14-ին Փարիզում Ամենայն Հայոց Կաթողիկոսը հանդիպում ունեցավ շվեյցարահայ համայնքի ներկայացուցիչների հետ: Վեհափառ Հայրապետը գոհունակությամբ ընդունեց հաղորդումն այն մասին, որ Շվեյցարիայի Հայ Առաքելական Եկեղեցու Խորհուրդը լուծարվել է հոկտեմբեր 2-ին կայացած Ընդհանուր Անդամական Ժողովի որոշմամբ: Հետխորհրդակցության որոշվեց հանձնարարել Ժնևի և Լեման շրջանի նորակազմ ծուխի ատենապետ Արդեն Շելլեֆյանին և արդեն լուծարված Շվեյցարիայի Հայ Առաքելական Եկեղեցու Խորհրդի ատենապետ, Սուրբ Գրիգոր Լուսավորիչ հիմնադրամի անդամ Դանիել Փափազյանին Շվեյցարիայի հայոց թեմի Առաջնորդական տեղապահ Տ. Մեսրոպ վարդապետ Պարսամյանի հետ, որպես Սուրբ Հակոբ եկեղեցու ընթացիկ հարցերի կառավարման կոմիտե, ձեռնամուխ լինել պատարագների վերսկսմանը Ժնևի Ս. Հակոբ եկեղեցում և Ժնևի ու Լեմանի շրջանի Ընդհանուր անդամական ժողովի հրավիրմանը: Նորին Սրբությունը, իր օրհնությունը բերելով շվեյցարահայ համայնքի ներկայացուցիչներին, հաջողություն մաղթեց նրանց աշխատանքներին, որով Ժնևի հայ համայնքը կվերագտնի իր ներքին խաղաղ կյանքը և համախորհուրդ համայնքային մնացյալ կառույցների հետ ձեռնամուխ կլինի թեմական կառույցների ձևավորմանը և Շվեյցարիայի ազգային-հոգևոր կյանքի արդյունավետ կազմակերպմանը:

Շվեյցարիայի Հայոց թեմ

Արդեն մի քանի ամիս է, որ տեղական և Սփյուռքի մամուլում ակտիվ քննարկվում է Շվեյցարիայի Հայոց թեմում եղած խնդիրների և տարաձայնությունների հարցը: Որոշներ շտապեցին սկանդալային նյութեր պատրաստել, առանց խորամուխ լինելու խնդրի մեջ, ոմանք սրտացավորեն փորձեցին հասկանալ, թե ինչ խնդիր է իր առաջ դրել Մայր Աթոռը կամ ինչու է Ժնևի համայնքն ընդվզում: Թեև մշտապես Մայր Աթոռը պարզաբանումներ էր ներկայացնում հարցի առնչությամբ, բայց միևնույնն է, որոշ մարդիկ խուլ ձևացան և շարունակեցին լրացնել անգետ հրապարակումների շարքը :
Շողակաթ հեռուստաընկերությունը, հիմնվելով Մայր Աթոռի արխիվում եղած փաստաթղթերի վրա, պատրաստեց տեսանյութ, որը լույս է սփռում շատ հարցերի վրա: Հուսով եմ, այս տեսանյութը դիտելիս շատ հարցերի պատասխաններ կգտնեք: Իսկ եթե հարցեր լինեն, կփորձեմ օգնել Ձեզ:

Ժնև և Նիցցա քաղաքների հայ համայնքների խնդիրների շուրջ

Վերջին շրջանում Եկեղեցու թեմական կյանքին վերաբերող որոշ հարցեր քննարկման թեմա են դարձել: Հատկապես Շվեյցարիայի Ժնևի և Ֆրանսիայի Նիցցայի համայնքների շուրջ քննարկումները և որոշ ՎԵՐԼՈՒԾԱԲԱՆՆԵՐԻ դիտարկումներ մոտենում են զավեշտի ժանրին:
Այս և նման հարցերի շուրջ Նվեր Մնացականյանի հետ զրուցում է Շահե աբեղա Անանյանը:
Առաջարկում եմ դիտել տեսանյութը համակ ուշադրությամբ: Եթե լինեն հարցեր կապված նշյալ համայնքների հետ, կարող եք մեկնաբանությունների կամ անձանական հաղորդագրությունների միջոցով ստանալ պատասխանները:

Կարգազանցությունը եկեղեցական կյանքում անընդունելի է

Տ. Աբել քահանա Մանուկյանի կախակայման վերաբերյալ Մայր Աթոռի տեղեկատվական համակարգի տարածած հաղորդագրության առիթով «Հրապարակ» օրաթերթի մայիսի 7-ի «Քահանային ետ են կանչում» հոդվածում տեղ գտած տեղեկությունների ու մեկնաբանությունների առնչությամբ հարկ եմ համարում տալ որոշ լուսաբանություններ:

Նախ` Տ. Աբել քահանան երբեւէ Ժնեւում ծառայության չի նշանակվել ոչ Վազգեն Ա կաթողիկոսի, ոչ էլ հաջորդ հայրապետների կողմից: Նա ինքնակամ ստանձնել է Ժնեւի Ս. Հակոբ եկեղեցու հոգեւոր հովվի պաշտոնը` պատճառ դառնալով թեմական եւ ներհամայնքային տարաձայնությունների ու խառնաշփոթի:

Ստեղծված կացությունը համընկավ Վազգեն Առաջին հայրապետի գահակալության վերջին տարվա հետ եւ նրա վախճանման պատճառով չգտավ իր հանգուցալուծումը: Գարեգին Ա կաթողիկոսն ընտրությունից հետո անմիջապես հայրապետական գրությամբ դատապարտեց Տեր Հոր քայլը` որպես Հայ եկեղեցու կանոնական սկզբունքների խախտում, արգելելով նրան քահանայագործել Ժնեւում` իբրեւ մնայուն հովիվ: Ցավոք, հայրապետական տնօրինությունն անտեսվեց ժամանակին, եւ հովվապետի վաղահաս մահվան պատճառով խնդիրը վերստին առկախ մնաց:

Շվեյցարիայի թեմում ստեղծված ներկայիս կացության մեջ Մայր Աթոռ Ս. Էջմիածինը կախակայել է Տ. Աբել քհն. Մանուկյանի քահանայագործությունը դրսեւորած կարգազանց ընթացքի` Շվեյցարիայում դեռեւս 1992թ. հաստատված կանոնական թեմի իրողությունը մերժելու, նորանշանակ առաջնորդական տեղապահի եւ Ժնեւի Սուրբ Հակոբ եկեղեցու հովվի հանգամանքը չճանաչելու եւ Մայր Աթոռ ներկայանալու` Հայրապետական հրահանգները չկատարելու համար:

Այս է իրողությունը, իսկ մնացյալը մի խումբ մարդկանց կողմից կատարվող անհիմն եւ սադրիչ արտահայտություններ ու կոչեր են:

Վահրամ քահանա ՄԵԼԻՔՅԱՆ, Մայր Աթոռ Սուրբ Էջմիածնի տեղեկատվական համակարգի տնօրեն

Կախակայվում է Տ. Աբել քահանա Մանուկյանի քահանայագործությունը

Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի տնօրինությամբ մայիսի 10-ից կախակայվում է Տ. Աբել քահանա Մանուկյանի քահանայագործությունը դրսևորած կարգազանց ընթացքի` Շվեյցարիայում հաստատված կանոնական թեմի իրողությունը մերժելու, նշանակված առաջնորդական տեղապահի և Ժնևի Սուրբ Հակոբ եկեղեցու հովվի հանգամանքը չճանաչելու և Մայր Աթոռ ներկայանալու Հայրապետական հրահանգները չկատարելու համար:

Մայր Աթոռից տեղեկացնում են, որ Աբել քահանային հրահանգվել է մեկշաբաթյա ժամկետում ներկայանալ Մայր Աթոռ Սուրբ Էջմիածին, Վանական Խորհրդին:

Տեղեկացնենք, որ կախակայման ընթացքում կարգազանց եկեղեցականին արգելվում է կատարել ծիսապաշտամունքային որևէ արարողություն, հակառակ պարագային կատարված արարողությունն անվավեր է:
 

Աղբյուր` Panorama.am

Ժնեւի եկեղեցական վարչությունն արտահայտողը չէ շվեյցարահայության կամքի

Օրեր առաջ թե Հայրենիքի եւ թե Սփյուռքի տարբեր հայկական լրատվամիջոցներին առաքվեց Գարեգին Բ Ամենայն հայոց կաթողիկոսին ուղղված նամակի օրինակը` ստորագրված Ժնեւի Ս. Հակոբ հայկական եկեղեցու եկեղեցական վարչության նախագահ Վիգեն Վարձպետի ստորագրությամբ:

Իսկ ապրիլ 2-ին «Հրապարակ» օրաթերթին տված իր հարցազրույցում նշյալ անձն ուղղակի նենգափոխում է փաստերը