07.04.2014

Ավագ Շաբաթ - լուսանկարներ ՖԲ գլխավոր էջի համար

Հայ Եկեղեցում Սուրբ Հարության տոնին նախորդող շաբաթը կոչվում է Ավագ Շաբաթ: Այն սկսվում է Ծաղկազարդի տոնով եւ ավարտվում Ավագ շաբաթ օրը երեկոյան: Ավագ Շաբաթը խորհրդանշում է Քրիստոսի կյանքի վերջին օրերը` չարչարանքները, խաչելությունը եւ հարությունը: Այս տարի Ավագ Շաբաթը նշվում է ապրիլի 13-20-ը ընկած ժամանակահատվածում:
Մանրամասներն այստեղ.
http://www.qahana.am/?ln=am&page=spiritual_library_item&id=483

Այս նկարները կարող եք օգտագործել որպես ՖԲ-յան ձեր էջի գլխավոր լուսանկար:







22.10.2013

ԹՈՂ ԳԱԶԻ ՈՏՆԱԿԸ

ԹՈՂ ԳԱԶԻ ՈՏՆԱԿԸ - Ահա այսպիսի զգուշացումով մեծ ցուցապաստառներ կան Գերմանիայի գլխավոր մայրուղիների եզրերին: 
Մենք ևս նմանօրինակ ցուցապաստառների կարիքն ունենք:









16.10.2013

Քրիստոս արցունքներով է քեզ փնտրում

Լուսանկարը` Արթուր Մանուչարյանի
Տ. Սահակ եպիսկոպոս Մաշալյան,
Հատված «Երկու ուխտավոր» վեպից

Պարզ հավատացյա՞լ ես. դու ամենաբախտավորն ես: Ոչ մեկի կյանքը քոնի նման հարուստ չէ, և ոչ մեկին վիճակված չէ հավաքել անդնդի չքնաղ ծաղիկները, որ դու կարող ես հավաքել այս կյանքի ընթացքում: Միայն թե մենակ, առանց հովվի մի քայլիր: Քայլիր եկեղեցու հետ, որովհետև դեռ գառնուկ ես, իսկ շուրջբոլորդ շատ են գայլերը`անթիվ, անհամար: Դու բախտավոր ես, որովհետև Քրիստոս արցունքներով է քեզ փնտրում, և Հայրը սպասում է, որ ապահով տուն վերադառնաս: Սուրբ Հոգու շնորհները Եկեղեցու ծորակներից լիառատորեն քեզ համար են հեղվում: Վերևում հիշված բոլոր մարդիկ քեզ համար են, սիրելի հիվանդ եղբայր, այս աշխարհի անտառներում կորած, խաբված, ցեխերի մեջ տապալված ու ցեխոտված, բայց միշտ ադամանդ եղբայր, դու`ոսկի, դու` անգին, թանկագին եղբայր:

05.10.2013

Այլասերված արժեքները մեր առջև դրվում են որպես նորաձևություն

Ողջ մարդկության առաջ մի մեծ վտանգ է կանգնած։ Որոշ մութ և չարամիտ կենտրոններ կան, որոնք ցանկանում են, որ ամբողջ աշխարհը դառնա ընդարձակ մի Հոլիվուդ՝ իր ցոփ ու թուլամորթ արժեքներով. արժեքներ, որ մերը չեն: Հեթանոս աշխարհի այլասերված հին արժեքները մեր առջև են դնում որպես նորություն, նորաձևություն և առաջադիմություն։ Արդիականության անվան տակ անփորձ երիտասարդներին և նորապսակներին են մատուցում բոլոր լկտիություններն ու ցոփությունները, որոնք թափանցում են մեր ընտանիքներից ներս` խանգարելով մեր ավանդական հաստատ կառույցները: Համաճարակ դարձող այս նեխած, այլասերած ու փչացած արժեքները և քայքայված բարոյականությունը խորտակեցին Սոդոմն և Գոմորը, խորտակեցին հսկա Հռոմեական Կայսրությունը: Եթե չկասեցվի այս չար ընթացքը, անտարակույս, մեր ներկա քաղաքակրթությունն էլ պիտի կործանվի։
Բայց մենք` քրիստոնյաներս, մենք` քրիստոնյա հայերս, եկեք կառչած մնանք մեր մաքուր, սուրբ և հարազատ արժեքներին: Դրանք մինչև այժմ մեզ փրկել են, հիմա էլ պիտի փրկեն. մինչև հիմա երջանիկ են մեզ դարձրել, սրանից հետո էլ երջանիկ պիտի դարձնեն:


Տեր Սահակ եպիսկոպոս Մաշալյան
Հատված Մայր Տաճարում խոսված քարոզից

04.10.2013

Ընտանիքն է տարրական պետությունը և տարրական եկեղեցին

Երբեմն վիճաբանում ենք, թե արդյոք հայի համար ո՞րն է ամենակարևոր հաստատությունը. պետությո՞ւնն է, Եկեղեցի՞ն, դպրո՞ցն է, երգն ու պա՞րն են, մամուլն ու գրականությո՞ւնը, մայրենի լեզու՞ն: Ո՞ր մեկն է ամենից կարևորը, որի շնորհիվ ապահովում ենք մեր գոյությունը: Նշվածներից և ոչ մեկը. ԸՆՏԱՆԻՔՆ է ամենից կարևորը, որովհետև պահեր են եղել, որ մենք պետություն չենք ունեցել, տեղեր են եղել, որ մենք եկեղեցի կամ եկեղեցական չենք ունեցել, դպրոց էլ չենք ունեցել, մոռացել ենք նույնիսկ մեր լեզուն, բայց քանի դեռ հայ ընտանիքը մնացել է, մենք գոյատևել ենք: Ինչո՞ւ է այսպես. շատ պարզ է պատասխանը. որովհետև ընտանիքն է տարրական պետությունը, ընտանիքն է տարրական եկեղեցին, տարրական դպրոցը և մշակութային օջախը:
Հետևաբար, սիրելիներ, եկեք շարունակենք մեր պատմության ընթացքը` գուրգուրալով հայ ընտանիքի սրբության վրա, հառաջ դնենք, սատար կանգնենք մեր ընտանիքներին, որովհետև մեր ազգի գոյատևման գաղտնիքը այնտեղ է. այնտեղ է գաղտնիքը մեր ազգային դիմացկունության, որ մենք կարողացանք տոկալ ամեն ինչի և պիտի դիմագրավենք դեռ ինչ-ինչ դժխեմ արհավիրքներ։

Տեր Սահակ եպիսկոպոս Մաշալյան
Հատված Մայր Տաճարում խոսված քարոզից

02.10.2013

Եթե ուզում ես վանական դառնալ...

Լուսանկարը` Արթուր Մանուչարյանի
Ուզում ես վանակա՞ն լինել, սիրի՜ր վանքիդ պատերը, երկար ժամերգությունները, փոշոտ մագաղաթները, լռությունն ու առանձնությունը և սովորիր հաշտ ապրել կիսակատար եղբայրներիդ հետ: Տարիներ հետո այս բոլորը քեզ իրենց խորը գաղտնիքները կհանձնեն, և դու կհասկանաս, որ վանքը մեռնելուց առաջ քո մտած քավարանն է, որտեղ սիրտը, կրակների միջով անցնելով, սովորում է Աստծուն համբուրել: Բայց շուտով վանականն իրազեկ է դառնում, որ իր շուրթերն աղտոտ են, իսկ թևերը` պիղծ, Սիրելիին մոտենալու և Նրան ողջագուրվելու համար: Եվ վանականը մեղքերի հանդեպ իր գիտակցությամբ Սուրբ Նարեկի նման տառապում է և հազար ու մեկ ձևեր փնտրում, որպեսզի մեկ աստիճան ավելի մոտենա Սիրելիին: Վանքը նպատակ չէ, նույնիսկ եթե ամբողջ մի կյանք տրամադրես դրան և այնտեղ թաղվես: Վանքը մեր ճամբորդության վրա դեպի երկինք ուղղված սոսկ կայարան է:


Հատված «Երկու ուխտավոր» վեպից

22.03.2013

ԱՎԱԳ ՇԱԲԱԹԸ ՄԱՅՐ ԱԹՈՌ ՍՈՒՐԲ ԷՋՄԻԱԾՆՈՒՄ. 2013թ.




ԾԱՂԿԱԶԱՐԴ /մարտի 24/

- 1000 Անդաստան և մանուկների օրհնություն
- 1100 Ս. Պատարագ
- 1730 Դռնբացեք

ԱՎԱԳ ՀԻՆԳՇԱԲԹԻ  /մարտի 28/

-         730 Առավոտյան ժամերգություն և Կարգ ապաշխարողաց.
-         1030 Սուրբ Պատարագ
-         1600 Ոտնլվայի կարգ
-         1900 Խավարման կարգ

ԱՎԱԳ ՈՒՐԲԱԹ  /մարտի 29/

-         1200 Խաչելության կարգ
-         1730 Թաղման կարգ

ԱՎԱԳ ՇԱԲԱԹ  /մարտի 30/

-         1730 Երեկոյան ժամերգություն և Ճրագալույցի Ս. Պատարագ

ՍՈՒՐԲ ԶԱՏԻԿ  /մարտի 31/

-          1030 Հայրապետական Ս. Պատարագ:



Մայր Աթոռ Ս. Էջմիածին, Տեղեկատվական համակարգ             

12.03.2013

Աղոթք` ուղղված մեր Տեր Հիսուս Քրիստոսին

Աշխարհաբար:
Նայիր, Տեր, քաղցրությամբ դառնացնողիս, Տեր իմ և Աստված իմ, Հիսուս Քրիստոս: Մի բարկանա ինձ վրա, Տեր իմ, իմ բազում մեղքերի համար, և մի մերժիր իսպառ քո ձեռքի գործիս. ինձ չհասնի անոխակալիդ ցասումը, և մի անտեսիր տարակուսածիս, Տեր ներող և անհիշաչար: Հիշիր, մարդասեր, մեղքով վտանգվածիս և ողորմությամբ պատիր վիրավորվածիս խոցերը, քանի որ մեղքի կապանքները պատեցին ինձ, և հանցանքի բազմությունը պաշարեց ինձ: Օգնության հասիր կործանվածիս և փրկիր մեղքից բռնվածիս, որից դողում եմ, դժոխքի դառնությունից փրկիր ինձ, Տեր իմ, և սարսում եմ անշեջ հրից, պահիր ինձ` եղկելիիս, Աստված իմ. մեղքով աղտեղվածիս մաքրիր, Տեր իմ, և ինձ միացրու ի սկզբանե սրբերին, Աստված իմ. և մեղքերից խփվածիս հրավիրիր երկնքի անճառ արքայությունը` քո սուրբ անվան կամարարների մոտ, որ նրանց հետ փառավորեմ ամենազոր տերությանդ հավիտյանս հավիտենից. ամեն:
Գրաբար:
Նայեա, Տէր, քաղցրութեամբ առ դառնացուցիչս, Տէր իմ եւ Աստուած իմ, Յիսուս Քրիստոս: Մի բարկանար ինձ, Տէր իմ, վասն բազում մեղաց իմոց, եւ մի մերժեր ի սպառ զգործս ձեռաց քոց. մի հասցէ ի վերայ իմ ցասումն անոխակալիդ, եւ մի անտես արասցես զտարակուսեալս, Տէր երկայնամիտ եւ անյիշաչար: Յիշեա, մարդասէր, զվտարանդեալս մեղաւք եւ պատեա ողորմութեամբ զվէրս վիրաւորելոյս, քանզի տոռունք մեղաց պատեցան զինեւ, եւ հոյլք յանցանաց պաշարեցին զիս: Հաս յաւգնութիւն կործանելոյս եւ փրկեա զխաղբակեալս ի մեղաց, յորմէ դողամ, ի դառնութենէ դժոխոցն ապրեցո զիս, Տէր իմ. եւ յորմէ սարսեմ` յանշէջ հրոյն, պահեա զիս զեղկելիս, Աստուած իմ. զմեղաւք աղտեղեալս սրբեա, Տէր իմ, եւ ի սկզբանէ սրբոցն մասնակից արա զիս, Աստուած իմ. եւ զհարուածեալս ի մեղաց` հրաւիրեա յանճառ երկնից յարքայութիւնդ առ կամարարս անուանդ քում սրբոյ, զի ընդ նոսին փառաւորեցից զամենազաւր տէրութիւնդ յաւիտեանս յաւիտենից. ամէն:

Հովհաննես Գառնեցի, «Աղոթամատույց» 

26.02.2013

Սուրբ Ներսես Շնորհալի, Արևագալի ժամերգություն


Աշխարհաբար:
Ճանապարհ և Ճշմարտություն և Կյանք, Քրիստո'ս, առաջնորդի'ր մեզ` բարձրանալու երկրից դեպի երկինք:
Կյանքի մուտքի դուռ, Հիսո'ւս, մեզ էլ ներս տար Քո Հոր և Հոգու մոտ` միշտ փառաբանություններ երգելու:

Գրաբար:
Ճանապարհ եւ ճշմարտութիւն եւ կեանք, Քրիստո'ս. առաջնորդեա' հոգւոց մերոց յերկրէ ելանել յերկինս:
Դուռն կենաց մտից, Յիսո'ւս, մո'յծ եւ զմեզ առ Հայր քո եւ Հոգի՝ երգել միշտ զփառս:






Արևագալի ժամերգության բոլոր երգերը հասանելի են այստեղ:

25.02.2013

Երկուշաբթի օրվա աղոթք, Հովհաննես Գառնեցի


Աշխարհաբար:
Ո՛վ ամենակալ և ամենակարող Տեր և Աստված իմ, որ այս օրը քո ամենազոր և բարձրագույն խոսքով ջրերի զանգվածը անջրպետելով բաժանեցիր երկու մասի և անսուտ ամրությամբ սահմանեցիր երկնքի հաստատությունը ջրերի մեջ` բոլոր զվարթունների զբոսավայր: Ընկնում եմ Քո առջև և աղաչում Քեզ. Ասա՛ այդ խոսքովդ ինձ` «Թողնված են քե՛զ մեղքերդ» (Մատթ., Թ 5) բազում: Որովհետև իմ անօրինությունները բարձրացան իմ գլխից [վեր], և իմ հանցանքների բազմությունը ծածկեց ինձ: Չարասերիս չարիքին չափ չկա, և ոչ` թիվ ցավալի անօրինությանս: Հեռացրու ինձնից հանցանքներս, Տեր, և անջրպետելով վերացրու վերքերը վիրավորված ծառայիս, և արժանացրու անպիտան ծառայիս քո երկնային արքայությանը, քո բոլոր սրբերի մոտ, որ նրանց հետ փառավորեմ Ամենասուրբ Տերությունդ` Հայր և Որդի և Սուրբ Հոգի. այժմ և միշտ և հավիտյանս հավիտենից. ամեն:

22.02.2013

Ուրբաթ օրվա աղոթք, Հովհաննես Գառնեցի

Աշխարհաբար:
Էապես բարի և ամենակարող զորություն, Տեր իմ և Աստված իմ, որ այս օրը երկրին հրամայեցիր հանել գազաններն ու անասունները, սողուններն ու չորքոտանիները` իրենց տեսակներով, վայրիներն ու ընտանիները, և այս օրը մարդուն ստեղծեցիր ինքնիշխան, և նրան տեր ու իշխան կարգեցիր քո բոլոր ձեռակերտների վրա, և նրան փրկության դրախտում դրեցիր` պահելու պատվիրանը, բայց իմն է նախահոր պատվիրանազանցությունը, որի համար արտաքսվեցինք պայծառ պատվից ու փափուկ փառքից: Մանավանդ որ, նա փոքր ու թեթև հանցումով մի անգամ խաբվեց, իսկ ես անթիվ և մեծամեծ հանցանքներով մեղանչում եմ անդադար, ուստի դատապարտվածիս համար այս օրը խաչ բարձրացար, Բանդ Աստված: Եվ արդ, աղաչում եմ Քեզ, ներողամիտ ու անոխակալ Տեր իմ և Աստված իմ, ողորմիր ինձ ողորմելիիս և մեղքով լցվածիս: Մի՛ զգետնիր պատկերս, որին [կենդանության շունչ] փչեցիր, և մի՛ մատնիր ինձ, որ ստեղծեցիր, հավիտենական տանջանքի, քանի որ Քոնն եմ, Տեր, և հույսս Դու ես, և Քեզնից եմ ակնկալում արձակվել հանցանքներիս կապանքից: Ուստի, Տեր, կհանգեցնես ինձ մեղքի թողության և հանցանքի քավության, և շեղվածիս մասնակից կդարձնես արդար մարդկանց և նախապես ընտրվածներին, որպեսզի նրանց հետ մշտնջենական հանգիստը մտնելով` փառավորեմ Ամենազոր Տերությունդ. հավիտյանս հավիտենից. ամեն: